73 од 100 вработени земале плата под месечниот просек

Просекот е точен. Но точен за кого?

Замисли десет вработени. Девет од нив заработуваат различни износи, но сите се блиску до 24.000 денари.

Едно лице заработува 184.000 денари.

Забележете како просекот, кој се движеше нагоре-надолу во зависност од секоја плата, сепак остануваше релативно стабилен досега. Но со само една висока плата, погледнете колку се нарушува просекот: скок од цели 66,7% во однос на просекот на деветте плати.

Просекот на сите десет плати изнесува точно 40.000 денари и не е блиску ниту до платите на деветте вработени ниту до онаа една висока плата.

Просекот не ја покажува платата на мнозинството

Ова не е измислен пример. Од вкупно 6,26 милиони исплатени месечни плати во 2025 година, само 46 биле еднакви на официјалната просечна плата за соодветниот месец.

Ако сите плати ги претставиме со 100 квадрати, овие 46 не би исполниле ниту еден.

И покрај тоа, просечната плата редовно се цитира како показател за животниот стандард. Таа растела од 43.050 до 46.889 денари во текот на годината.

Податоците на УЈП покажуваат дека во секој месец меѓу 71,85% и 73,80% од вработените земале плата пониска од просекот.

Линијата на просекот ги дели: 73 лево, 27 десно.

Речиси секој втор заработувал меѓу 24.380 и 36.900 денари

Кога платите ќе се разгледаат по интервали, распределбата станува појасна: 50% од вработените, односно секој втор, земале плата во тој опсег.

Ако се вклучат и оние со плата еднаква или пониска од минималната, 52,9% заработувале до 36.900 денари. Со вклучување и на групата до просекот, уделот достигнува 73,1%.

Само 3,4% земале повеќе од 100.000 денари месечно.

Една плата колку 817 минимални

Според изјава на ССМ, на едно лице за еден месец му била исплатена нето-плата во висина на 817 минимални плати, односно околу 19,9 милиони денари.

Во мај 2025, на еден вработен со плата над 100.000 денари доаѓале приближно 21 вработен со плата под месечниот просек.

ССМ бара минимална плата од 500 евра

Во април 2025, ССМ побара минимална плата од најмалку 500 евра и зголемување од 100 евра на сите други плати.

Погледни го видеото (4:29).

Наша пресметка: 500 евра се околу 30.750 денари, односно околу 26% повеќе од сегашната минимална плата од 24.379 денари.

Речиси никој не ја добил просечната плата

Од 6,26 милиони месечни евиденции, само 46 биле точно еднакви на официјалната просечна плата, односно една на секои 136.000 евиденции.

Месечно, нивниот број се движел од 0 до 11, а најмногу имало во август.

Во јануари, март, мај, септември и декември немало ниту една евиденција точно на просекот.

Ниту просечната плата не ја покрива минималната семејна кошница

Во јули 2025, синдикалната минимална кошница за четиричлено семејство изнесувала 65.328 денари, без кирија, според пресметката на ССМ.

Просечната плата покривала само 69,3% од кошницата, при што недостигале 20.052 денари. Минималната покривала само 37,3%, при што недостигале 40.949 денари.

Со кирија за стан од 60 m², кошницата изнесувала 80.703 денари, а просечната плата покривала 56,1% од неа.

Синдикалната кошница

Како ССМ ја пресметува минималната потрошувачка кошница за четиричлено семејство.

Погледни го видеото (5:18).

Високите плати растат, а уделот под просекот останува непроменет

Бројот на вработени со плата над 100.000 денари пораснал од 16.823 во јануари на 19.996 во декември, што претставува раст од 18,9%.

И покрај тоа, уделот под просекот останал речиси непроменет во текот на целата година. Дури и во декември, 73,72% сè уште заработувале под просекот.

Во сите месеци тој удел бил меѓу 71,85% и 73,80%.

Просекот е точен. Реалноста на мнозинството е поинаква.

Просечната плата не е погрешна бројка. Но не покажува како се распределени платите, ниту колку заработува мнозинството работници.

Сојузот на синдикатите протестира за повисоки плати

Во февруари 2026, Сојузот на синдикатите започна со блокади на пристапите до Собранието како реакција на одбивањето на пратениците да ги зголемат платите на работниците.

Погледни го видеото (3:42).