Глобалното затоплување се чувствува и во Македонија

Последниот извештај на Обединетите нации алармира дека на Земјата и се заканува пораст на температурата за 2,7 степени до крајот на векот. Подготвена ли е Македонија за 9 години да ги исполни амбициозните национални заложби кон Парискиот Договор за 51% редукција на стакленичките гасови кои влијаат врз загревање на планетата?

Порастот на температурите го отвора прашањето дали земјата ги исполнува обврските за кои се залага преку потпишувањето на Парискиот договор за климатски промени. Со овој потпис, земјата пред пет години се обврза дека ќе го одржува зголемувањето на глобалната просечна температура под 2 целзиусови степени.

Во последниот извештај на Меѓународниот панел за климатски промени објавен од Обединетите нации, научниците предупредија дека човечките активности ја менуваат климата на Земјата на начини какви што не се видени илјадници, ако не и стотици илјади години, при што некои од промените се неизбежни и неповратни. Според наодите на извештајот, температурите до 2040-та година според сите сценарија за емисија, ќе достигнат раст од 1,5 Целзиусови степени над нивото забележано во периодот од 1850-та до 1900-та година. Проценките на ИПЦЦ се дека Арктикот најверојатно ќе биде без мраз до 2050-та година.

THOMAS SAMSON/AFP/GETTY IMAGES

Последиците од климатските промени се чувствуваат и во целата држава. Во последните три децении, просечната годишна температура се зголемила за два степени. Податоците од Министерството за животна средина и просторно планирање (МЖСПП), измерени од Управата за хидрометеоролошки работи, покажуваат дека просечната средногодишна температура на воздухот во Скопје за периодот 1981-1990 година изнесувала 12,6 степени. Во 2019 година, мерењата покажуваат рекордно отстапување од 2 целзиусови степени. Слична е ситуацијата и во најтоплиот град во земјава, Гевгелија, каде што просечната средногодишна температура бележи пораст од 2,5 степени.